पदवीधर मतदारांपर्यंत पक्षाची भूमिका पोहोचवावी

नागपूर :  कार्यकर्त्यांनी संघटितपणे मैदानात उतरून पदवीधर मतदारांपर्यंत पक्षाची भूमिका पोहोचवावी, असे आवाहन शहर काँग्रेसचे अध्यक्ष तथा आमदार विकास ठाकरे यांनी केले.

आगामी पदवीधर मतदारसंघ निवडणुकीसंदर्भात नियोजन करण्यासाठी काँग्रेसच्या नागपूर लोकसभा क्षेत्रातील पदाधिकाऱ्यांच्या आढावा बैठकीचे आयोजन आमदार निवास येथील सभागृहात करण्यात आले होते. शहर काँग्रेसचे अध्यक्ष तथा आमदार विकास ठाकरे, प्रदेश काँग्रेसचे वरिष्ठ उपाध्यक्ष तथा आमदार अभिजित वंजारी, ज्येष्ठ नेते गिरीश पांडव, प्रदेश काँग्रेसचे अतुल कोटेचा, महानगरपालिकेतील विरोधी पक्षनेते संजय महाकाळकर आणि विशाल मुत्तेमवार यांची यावेळी प्रमुख उपस्थिती होती.

बैठकीत आगामी निवडणुकीच्या पार्श्वभूमीवर संघटनात्मक तयारी, पदवीधर मतदारांशी संपर्क वाढविणे, तसेच मतदान नोंदणी आणि प्रचाराची रूपरेषा यावर सविस्तर चर्चा करण्यात आली.

यावेळी मार्गदर्शन करताना आ. विकास ठाकरे म्हणाले की, पदवीधर मतदारसंघ हा सुशिक्षित आणि विचार करणाऱ्या मतदारांचा मतदारसंघ आहे. त्यामुळे काँग्रेसच्या विचारधारेचा आणि पक्षाच्या धोरणांचा प्रभावीपणे प्रचार करण्याची जबाबदारी कार्यकर्त्यांनी घ्यावी. शहरातील प्रत्येक प्रभागात आणि संस्थांमध्ये जाऊन पदवीधर मतदारांशी संवाद साधत त्यांना काँग्रेसच्या भूमिकेबद्दल माहिती देणे गरजेचे आहे. पक्षाचे पदाधिकारी आणि कार्यकर्ते एकजुटीने काम करतील, तर या निवडणुकीत काँग्रेसला निश्चितच यश मिळेल, असा विश्वासही त्यांनी व्यक्त केला.

प्रदेश काँग्रेसचे वरिष्ठ उपाध्यक्ष तथा आमदार अभिजित वंजारी यांनीही कार्यकर्त्यांना मार्गदर्शन करताना पदवीधर मतदारसंघ निवडणुकीचे महत्त्व अधोरेखित केले. ते म्हणाले की, शिक्षित वर्ग समाजातील प्रश्नांबाबत जागरूक असतो आणि शासनाच्या धोरणांवर बारकाईने लक्ष ठेवतो. आज राज्य आणि देशातील अनेक महत्त्वाच्या प्रश्नांवर काँग्रेसची भूमिका ठाम आणि जनहिताची आहे. ही भूमिका पदवीधर मतदारांपर्यंत पोहोचविण्यासाठी कार्यकर्त्यांनी घराघरात संपर्क साधावा.

पदवीधर युवक, शिक्षक, व्यावसायिक आणि विविध क्षेत्रातील सुशिक्षित मतदार यांच्याशी सातत्याने संवाद साधून त्यांच्या समस्या जाणून घेणे आणि त्या सोडविण्यासाठी काँग्रेस कटिबद्ध असल्याचा संदेश देणे आवश्यक आहे, असेही त्यांनी सांगितले.

बैठकीत उपस्थित पदाधिकारी व कार्यकर्त्यांनी निवडणुकीच्या दृष्टीने विविध सूचना मांडल्या. आगामी काळात शहरातील विविध भागांमध्ये पदवीधर मतदारांशी संवाद साधण्यासाठी विशेष अभियान राबविण्याचा निर्णयही यावेळी घेण्यात आला.

या बैठकीला शहर काँग्रेसचे पदाधिकारी, प्रभाग अध्यक्ष, तसेच मोठ्या संख्येने कार्यकर्ते उपस्थित होते.